പ്രാചീന സംസ്കാരത്തിന്റെ ശേഷിപ്പുകള്‍ ഉറങ്ങുന്ന പോര്‍ക്കുളം പഞ്ചായത്ത്‌

തൃശൂര്‍ ജില്ലയുടെ വടക്ക്‌ ഭാഗത്ത്‌ തലപിള്ളി താലൂക്കില്, ചൊവ്വന്നൂര്‍ ബ്ലോക്കിലാണ് പോര്‍ക്കുളം ഗ്രാമപഞ്ചായത്ത്‌ സ്ഥിതി ചെയ്യുന്നത്.‍ തൃശ്ശൂരിന്റെ വാണിജ്യ നഗരം എന്നറിയപ്പെടുന്ന കുന്നംകുളത്തിനടുത്തുള്ള ഈ പഞ്ചായത്ത്‌ ഭൂവിസ്തൃതിയിലും ജനസംഖ്യയിലും ചെറുതാണ്. അകതിയൂര്‍, പോര്‍ക്കുളം, മങ്ങാട്‌ എന്നിങ്ങനെ വ്യാപിച്ചു കിടക്കുന്ന പോര്‍ക്കുളം ഗ്രാമപഞ്ചായത്തിനു 14.49 ചതുരശ്ര കിലോമീറ്റര്‍ വിസ്തീര്‍ണമുണ്ട്. ഈ പഞ്ചായത്തിന്റെ 2001 ലെ കണക്കനുസരിചുള്ള ജനസംഖ്യ 15192 ആണ്. പോര്‍ക്കുളം പഞ്ചായത്തിന്റെ അതിരുകള്‍ തെക്കുഭാഗത്ത് കുന്നംകുളം നഗരസഭയും, ആര്‍ത്താറ്റ്, ചൊവ്വന്നൂര്‍ എന്നീ പഞ്ചായത്തുകളും പടിഞ്ഞാറ് ഭാഗത്ത്‌ കാട്ടകാമ്പാല്‍ പഞ്ചായത്തും, വടക്കുഭാഗത്ത്‌ കടവല്ലൂര്‍ പഞ്ചായത്തും കിഴക്ക്‌ ഭാഗത്ത്‌ കടങ്ങ‌ോട് പഞ്ചായത്തുമാണ്. പഞ്ചായത്തിന്റെ കിഴക്ക്‌ ഭാഗത്ത്‌ കൂടി കോഴിക്കോട്‌ - തൃശൂര്‍ ഹൈവേ കടന്നുപോകുന്നു. പ്രകൃതി മനോഹരമായ കലശമലക്കുന്നും, ഐതീഹ്യ പ്രസിദ്ധമായ എട്ടുവരച്ച പാറയുമാണ് ഈ പഞ്ചായത്തിലെ ഉയര്‍ന്ന പ്രദേശങ്ങള്‍. ഈ പ്രദേശത്ത് നിന്നും ചുറ്റും നോക്കിയാല്‍ കാണുന്ന ദൂരക്കാഴ്ച്ചകള്‍ വിനോദ സഞ്ചാരികളെആകര്‍ഷിക്കുന്നവയാണ്. പ്രാചീന സംസ്കാരത്തിന്റെ ശേഷിപ്പുകള്‍ ഹരിതാഭമായ ഈ ഭൂപ്രദേശത്തിന്റെ വിവിധ ഭാഗങ്ങളില്‍ പതിഞ്ഞുകിടക്കുന്നു. സിന്ധുനഗരികതയുടെ ഏതാണ്ട് അതെ കാലയളവില്‍ തന്നെ ഈ ഗ്രാമത്തിലും ജനജീവിതത്തിന്റെ സജീവസാന്നിധ്യം ഉണ്ടായിരുന്നു എന്ന്‍ അനുമാനിക്കുന്നു. വൈദിക സംസ്കാരത്തിന്റെ സര്‍വകലാശാലയായി ഈ ഗ്രാമം ഒരു കാലത്ത്‌ തിളങ്ങി നിന്നിരുന്നു. പോര്‍ക്കുളം എന്നാ നാമധേയത്തിലാണ് ഈ ഗ്രാമം പണ്ടുകാലത്ത്‌ അറിയപ്പെട്ടിരുന്നത്. വേദപഠനങ്ങള്‍ക്ക് പ്രാധാന്യം നല്‍കുന്ന തറവാടുകളും അക്ഷരകളരികളുമുള്ള പഠനകേന്ദ്രങ്ങള്‍ പ്രാചീനകാലം മുതല്‍ തന്നെ ഈ പ്രദേശത്ത് നിലനിന്നിരുന്നു.

സാമൂഹ്യ സാംസ്കാരിക ചരിത്രം:

കൊച്ചി രാജാവും സാമൂതിരി രാജാവും തമ്മില്‍ ഇവിടെ വച്ച് പല യുദ്ധങ്ങള്‍ നടത്തിയിരുന്നത് കൊണ്ട ഇവിടെ 'പോര്‍ക്കള'മെന്ന പേരില്‍ അറിയപെട്ടു. പിന്നീടത്‌ 'പോര്‍ക്കുള'മായി. പ്രാചീന സംസ്ക്കാരത്തിന്റെ ശേഷിപ്പുകള്‍ കണ്ടെടുക്കപെട്ടിട്ടുള്ള ഹരിതാഭമായ പോര്‍ക്കുളം എന്ന ഈ ഗ്രാമത്തില്‍ സിന്ധു നാഗരികതയുടെ കാലം മുതല്‍ തന്നെ സംസ്കാരസമ്പന്നമായ ഒരു ജനത അധിവസിച്ചിരുന്നതായി കരുതാം. ഈ ഗ്രാമത്തിലെ വേദക്കാട് എന്നാ സ്ഥലത്തു നിന്നും ഖനനം ചെയ്തപ്പോള്‍ ലഭിച്ച നന്നങ്ങാടിയില്‍ നിന്നുമാണ് മണ്ണടിഞ്ഞു പോയ ഒരു പ്രാചീന സംസ്കാരത്തിന്റെ സൂചനകള്‍ ലഭിച്ചത്‌. കേരളത്തില്‍ ആദ്യമായി ശാസ്ത്രീയമായി ഖനനം നടത്തിയതും ഇവിടെ തന്നെയായിരുന്നു.ഖനനം ചെയ്തെടുത്ത നന്നങ്ങാടികള്‍ ക്രിസ്തുവിനും രണ്ടായിരം വര്‍ഷങ്ങള്‍ മുന്ബ്‌ ഉണ്ടായിരുന്നതാനെന്ന് തെളിഞ്ഞിട്ടുണ്ട്. വായ്‌ വട്ടം കൂടിയതും, വലിയ മണ്‍കലത്തിനട് സാമ്യമുള്ളതായ ഈ നന്നങ്ങാടികള്‍ക്കകത്ത്, ചെറുമണ്‍ പാത്രങ്ങളില്‍ എല്ലിന്‍ കഷ്ണങ്ങളും, തുരുമ്പ് പിടിച്ച ഇരുമ്പുകത്തികളും, മഴുവിന്റെ കഷ്ണങ്ങളും, കല്ലുമാണികളും ഉണ്ടായിരുന്നു. അക്കാലത്തെ ജനതയുടെ ഇടയില്‍ പ്രബലമായി നിലനിന്നിരുന്ന പുനര്‍ജന്മത്തെക്കുറിച്ചുള്ള വിശ്വാസം കൊണ്ടായിരിക്കാം പ്രാചീനമനുഷ്യരെ സംസ്കരിച്ചിരുന്ന നന്നങ്ങാടികളില്‍ പണിയായുധങ്ങള്‍ കൂടി അടക്കം ചെയ്തിരുന്നത്. മഹത്തായ ഒരു സാംസ്കാരിക പാരമ്പര്യം അവകാശപെടാവുന്ന ഈ പ്രദേശത്ത്‌ വേദപഠനങ്ങള്‍ക്ക് പ്രാധാന്യം നല്‍കിയിരുന്ന തറവാടുകളും അക്ഷര കളരികളും, പഠനത്തെ സഹായിക്കുന്ന കേന്ദ്രങ്ങളും പ്രാചീനകാലംമുതല്‍ തന്നെ നിലനിന്നിരുന്നു. വേദക്കാട് ദേവീക്ഷേത്രവും അകതിയൂര്‍ പ്രദേശത്ത്‌ കലശമലയില്‍ സ്ഥിതി ചെയ്യുന്ന ശിവക്ഷേത്രവും അതിപുരാതനമായ ക്ഷേത്രങ്ങളാണ്.പതിനഞ്ചാം നൂറ്റാണ്ടില്‍ കേരളത്തില്‍ ജീവിച്ചിരുന്ന പതിനെട്ടരക്കവികളില്‍ അരക്കവിയായ പട്ടേത്തിരിയും വേദശാസ്ത്ര വിശാരദന്മാരും ഇവിടെയായിരുന്നു ജീവിച്ചിരുന്നത്. ടിപ്പുവിന്റെ പടയോട്ടത്തെ ഇവിടുത്തെ നാട്ടുരാജ്യങ്ങളുടെ കീഴില്‍ ഉണ്ടായിരുന്ന പടയാളികള്‍ ശക്തമായി ചെറുത്തുവത്രേ. അവര്‍ നടത്തിയ ചെറുത്തുനില്‍പ്പ് ഈ പ്രദേശത്തെ ഒരു യുദ്ധക്കളം ആക്കി മാറ്റിയിരുന്നുവത്രെ. ഈ പ്രദേശത്തിന് പോര്‍ക്കളം എന്ന പേര് ലഭിക്കുവാന്‍ അതും ഒരു കാരണം ആയിതീര്‍ന്നിട്ടുണ്ടാകാം. പോര്‍ക്കുളം പഞ്ചായത്തിന്റെ വിദ്യാഭ്യാസ ചരിത്രം പതിനഞ്ചാം നൂറ്റാണ്ടിന്റെ ആദ്യ ദശകത്തില്‍ ആരംഭിക്കുന്നു. പോര്‍ക്കുളം വേദക്കാട്ടില്‍ അതിപ്രഗത്ഭരായ വേദ പണ്ഡിതന്മാരുടെ നേതൃത്വത്തില്‍ കേരളത്തില്‍ അങ്ങോളമിങ്ങോളമുള്ള പ്രദേശങ്ങളില്‍ നിന്നും പഠിതാക്കള്‍ വന്ന് വേദപഠനം നടത്തിയിരുന്നു. തുടക്കത്തില്‍ എഴുതാശാന്മാരുടെ വീടുകളില്‍ വരുത്തിയാണ് അക്ഷരാഭ്യാസം നടത്തിയിരുന്നത്. പില്‍കാലത്ത് തിരുതിക്കാട് ഒരു എകാദ്ധ്യാപക വിദ്യാലയം ആരംഭിച്ചു. എന്നാല്‍ ആ വിദ്യാലയം കേവലം നാല് വര്ഷം മാത്രമേ നിലനിന്നുള്ളൂ. എം.എല്‍.സി.എസ്. സ്കൂള്‍ ആയിരുന്നു പോര്‍ക്കുളം പഞ്ചായത്തില്‍ സ്ഥാപിതമായ ആദ്യ അംഗീകൃത സ്കൂള്‍. 1905 ല്‍ ആണ് ഈ സ്കൂള്‍ സ്ഥാപിതമായത്‌. തുടക്കത്തില്‍ എല്‍.പി. സ്കൂള്‍ ആയാണ് സ്ഥാപിതമായത്. പിന്നീട് യു.പി. സ്കൂള്‍ ആക്കി മാറ്റി. ഈ സമയത്ത് തന്നെ എം.കെ.എം.യു.പി. സ്കൂള്‍ തുടങ്ങിയതും ദേശത്തിന്റെ അഭിമാനാര്‍ഹമായ നേട്ടമായി കരുതാം. മങ്ങാട്‌ സെന്റ്‌ ജോസഫ്സ് സെന്റ്‌ സിറിള്‍സ് ഹൈസ്കൂള്‍ ആയിരുന്നു പഞ്ചായത്തിലെ അന്നത്തെ ഏക ഹൈസ്കൂള്‍. ഈ ഹൈസ്കൂള്‍ 1930 ല്‍ സ്ഥാപിതമായി. തിരുത്തിക്കാട് ഭാരതമാതാ പ്രൈമറി സ്കൂള്‍ 1955-1956 വിദ്യാഭ്യാസ വര്‍ഷത്തില്‍ പ്രവര്‍ത്തനം ആരംഭിച്ചു. നാടന്‍ കലകളും നാടന്‍ പാട്ടുകളും ഈ പ്രദേശത്ത്‌ പരക്കെ പ്രചാരത്തില്‍ ഉണ്ടായിരുന്നു.രാഷ്ട്ര പിതാവ് മഹാത്മാഗാന്ധി അക്കികാവ് എന്ന സ്ഥലത്തുവന്ന്‍ഒരു വൈദ്യശാലയ്ക്ക് ശിലാസ്ഥാപനം നടത്തുകയുണ്ടായി. മുകളില്‍ പ്രസ്താവിച്ച ക്ഷേത്രങ്ങള്‍ക്ക്‌ പുറമേ മറ്റ് 7 ക്ഷേത്രങ്ങള്‍ കൂടി പഞ്ചായത്തിലുണ്ട്. കൂടാതെ മുസ്ലീം 4 ആരാധനാലയങ്ങളും 4 ക്രിസ്ത്യന്‍ ആരാധനാലയങ്ങളും ഈ പഞ്ചായത്തില്‍ നിലവില്‍ ഉണ്ട്. പ്രമുഖ ചുമര്‍ ചിത്രകലാകാരന്‍ ആയിരുന്ന മമ്മിയൂര്‍ കൃഷ്ണന്‍ കുട്ടി ഈ പ്രദേശത്ത്‌ താമസിച്ചിരുന്നു.സുപ്രസിദ്ധ സാഹിത്യകാരന്‍ ആയിരുന്ന സി.വി.ശ്രീരാമന്‍,ല അയ്പ്‌ പാറമേല്‍, റഫീക്ക്‌ അഹമെദ് അക്കികാവ്, ദേവന്‍ പോര്‍ക്കുളം എന്നിവര്‍ ഈ പഞ്ചായത്തിലാണ് ജന്മംകൊണ്ടത്. കലകള്‍ക്കും, സാഹിത്യത്തിനും എക്കാലവും വളക്കൂറുള്ള മണ്ണാണ് പോര്‍ക്കുളം. കുറുമ്പൂര്‍ അപ്പുകുട്ടന്‍, ചെരുരുത്തി വേലപ്പന്‍, പി.വി.കോമന്‍ എന്നിവര്‍ ഈ ഗ്രാമത്തില്‍ നിന്നും സ്വാതന്ത്ര്യസമരത്തില്‍ പങ്കെടുത്ത വ്യക്തികളില്‍ പ്രധാനികളാണ്. പ്രജാമണ്ഡലം സംഘടിപ്പിച്ച ക്ഷേത്ര പ്രവേശന വിളംബര ജാഥയിലും ഇവരുടെ സജീവ പങ്കാളിത്തം ഉണ്ടായിരുന്നു. 1957-ല്‍ തെലുങ്കാനയില്‍ വെച്ച് ആചാര്യ വിനോബഭാവെ രൂപം കൊടുത്ത ഭൂദാന പ്രസ്ഥാനത്തിന്റെ പ്രതിനിധികള്‍ ഈ ഗ്രാമത്തിലും ചെറിയ അലകള്‍ ഉയര്‍ത്തുകയുണ്ടായി. ഇക്കണ്ടവാര്യരുടെ നേതൃത്വത്തില്‍ കൊച്ചിരാജ്യത്ത്‌ രൂപീകരിച്ച ഭൂദാന പ്രസ്ഥാനത്തിന്റെ എക്സിക്യൂട്ടീവ്‌ കമ്മിറ്റിയിലെ അംഗമായി ഈ ഗ്രാമത്തിലെ വി.വി. കോമന്‍ പ്രവര്‍ത്തിച്ചിരുന്നു. 1957 ല്‍ ആചാര്യവിനോബഭാവെ തന്റെ ഭൂദാന യാത്രക്കിടയില്‍ ഈ ഗ്രാമം സന്ദര്‍ശിച്ചിട്ടുണ്ട്. നിരവധി സാംസ്ക്കാരിക പ്രവര്‍ത്തനങ്ങള്‍ക്ക്‌ വേദിയായ പഞ്ചായത്തില്‍ ക്ലബ്ബുകളുടെ സജീവമായ പ്രവര്‍ത്തനം ശ്ലാഘനീയമാണ്. പോര്‍ക്കുളം, മങ്ങാട്‌, അകതിയൂര്‍, കൊങ്ങണൂര്‍, അക്കികാവ്‌ പ്രദേശങ്ങള്‍ കേന്ദ്രീകരിച്ച് ഇത്തരത്തില്‍ നിരവധി ക്ലബ്ബുകള്‍ പ്രവര്‍ത്തിക്കുന്നുണ്ട്.

കാര്‍ഷിക ചരിത്രം:

കാര്‍ഷിക മേഖലക്ക് പ്രാധാന്യമുള്ള പഞ്ചായത്തിന്റെ ഭൂവിസ്തൃതിയില്‍ നല്ലൊരു പങ്കും നെല്‍ വയലാണ്. ഇതില്‍ തന്നെ കോള്‍ നിലങ്ങളും മുണ്ടകന്‍ പാടങ്ങളും പെടും. പൊന്നാനി കോള്‍ മേഖലക്ക് കീഴില്‍ വരുന്ന മാങ്ങാട്‌, മാളോര്‍ക്കടവ്, വെട്ടികടവ്‌ പ്രദേശങ്ങളാണ് പഞ്ചായത്തിലെ പ്രതാന നെല്ലുല്‍പ്പാദന കേന്ദ്രങ്ങള്‍. ബണ്ട് കെട്ടി വെള്ളം തടഞ്ഞാണ് ഇരു കരയിലും ഉള്ള പ്രദേഷത്തുക്കാര്‍ കൃഷി നടത്തുന്നത്. നിരവധി ക്ഷീര കര്‍ഷകരുള്ള പഞ്ചായത്തില്‍ പ്രവര്‍ത്തന ക്ഷമമായ ക്ഷീര സംഘങ്ങള്‍ നിലനില്‍ക്കുന്നുണ്ട്. പഞ്ചായത്ത് തലത്തില്‍ പച്ചക്കറി ഉല്‍പാദനം വര്‍ദ്ധിപ്പിക്കുന്നതിന് ശ്രമകരമായ നടപടികള്‍ എടുക്കാന്‍ പഞ്ചായത്തിന് സാധിച്ചിട്ടുണ്ട്.

ഒരു കാലഘട്ടത്തില്‍ ജന്മി-പ്രഭൂ വര്‍ഗ്ഗങ്ങളുടെ കൈപിടിയില്‍ ആയിരുന്നു ഭൂരിഭാഗം കൃഷിയിടങ്ങളും. ജന്മി-കുടിയാന്‍ സമ്പ്രദായമായിരുന്നു ഇവിടെ നില നിന്നിരുന്നത്. വിളവെടുപ്പുകാലം സമൃദ്ധിയുടേയും ആഘോഷത്തിന്റെയും നാളുകളായിരുന്നു. ആദ്യ കാലത്ത്‌ വളരെയധികം ശ്രദ്ധയും പരിചരണവും നല്‍കിയിരുന്നത് നെല്‍കൃഷിക്കായിരുന്നു. കൃഷിക്കാവശ്യമായ ജലസേചനം കാളത്തേക്ക്, കൊട്ടത്തേക്ക്, വേനി, തൂലാത്തേക്ക്, ചക്രം ചവിട്ടല്‍ എന്നീ പരമ്പരാഗത രീതികളുപയോഗിച്ചായിരുന്നു. കാല ക്രമേണ കൃഷി രീതികള്‍ യന്ത്രവല്‍ക്കരണത്തിന് വിധേയമായി. ഈ പഞ്ചായത്തിലെ മുഖ്യധാന്യവിള നെല്ല് തന്നെയാണ്. രണ്ടു പൂവല്‍ കൃഷി രീതിയാണ് പൊതുവേ നടന്നുവന്നിരുന്നത്. നാടന്‍ നെല്‍ വിത്തിനങ്ങളായ വട്ടന്‍, നവര, ആര്യങ്കാളി, ചിറ്റേനി, തവളക്കണ്ണന്‍, ചീര, കൊടിയന്‍ എന്നിവയാണ് ഉപയോഗിച്ചിരുന്നത്. മങ്ങാട്ട്, പടവ്, അടിയറ പടവ്, കരുവാന്‍താഴം പടവ് എന്നിവിടങ്ങളിലായി പുഞ്ചകൃഷി ചെയ്തിരുന്നു. ആദ്യകാലങ്ങളില്‍ വളരെ പ്രയാസമേറിയ കൃഷിയായിരുന്നു പുഞ്ചകൃഷി. കാലക്രമേണ വെട്ടികടവ് ബണ്ടിന്റെ വരവോട്കൂടി വിപ്ലവകരമായ മാറ്റമാണ് പുഞ്ചകൃഷിക്കും മട്ടുമുണ്ടായത്. തിരുത്തിക്കാട്, പോര്‍ക്കുളം എന്നീ പ്രദേശങ്ങളില്‍ സ്ഥിരമായി നെല്‍വയലുകള്‍ വെള്ളത്തില്‍ മുങ്ങിപ്പോകുകയും കൊയ്ത്തുകാലത്ത് വരള്‍ച്ച അനുഭവപ്പെടുകയുമാണ് പതിവ്‌.

ടൂറിസം യാത്രകള്‍

വംശനാശം സംഭവിച്ചുകൊണ്ടിരിക്കുന്ന 'കുളവെട്ടി' മരങ്ങളാല്‍ സമ്പുഷ്ട്ടമായ കലശമലക്കുന്ന് ലോക ഹരിത ഭൂപടത്തില്‍ സ്ഥാനം പിടിക്കുന്നു. ലോകത്ത്‌ ആകെയുള്ള മുന്നൂറ് കുലവെട്ടി മരങ്ങളില്‍ നൂരെന്നവും കലശമലയിലാണ് ഉള്ളത്.അപൂര്‍വമായി കാണുന്ന വൃക്ഷത്തെ ദര്‍ശിക്കുന്നതിനായി വിദേശികളടക്കം നിരവതി പേര്‍ കലശമലയിലെത്താറുണ്ട്. ‌

'സൈസീജിയം ട്രാവ്വി കോറിക്കം' എന്ന ശാസ്ത്രനാമത്തില്‍ അറിയപ്പെടുന്ന വൃക്ഷത്തിന് കുളവെട്ടി, പൊരിയി, വാതംകൊല്ലി എന്നീ പേരുകളുമുണ്ട്. ഞാവല്‍ ഉള്‍പെടുന്ന 'മെറിട്ടേസി' കുടുംബത്തില്‍ ഉള്‍പെടുന്ന ഇരുനൂറ് അടി വരെ ഉയരത്തിലുള്ള ചെങ്കല്‍ കുന്നുകളിലാണ് വളരുക. ഭൂമിക്കടിയിലേക്ക് ഊര്‍ന്നിറങ്ങുന്ന ജലത്തെ ആഴത്തിലുള്ള വേരുപടലം കൊണ്ട് തടഞ്ഞുനിര്‍ത്തി വൃക്ഷം നില്‍ക്കുന്ന പ്രദേശം ചതുപ്പുനിലമാക്കി മാറ്റിയെടുക്കുവാന്‍ കുലവേട്ടിക്ക് കഴിയും. നീരുറവ പിടിച്ച നിര്‍ത്താന്‍ കുളവെട്ടിക്ക് കഴിയുമെന്നതിനാല്‍ പ്രദേശത്ത്‌ ജലക്ഷാമം ഉണ്ടാവുകയില്ല. കടുത്ത വേനലിലും കലശമലകുന്നില്‍ ജലസമൃദ്ധി ഉണ്ടാകുന്നത് കുലവെട്ടി മരങ്ങള്‍ ഉള്ളത് കൊണ്ടാണ്.

ആയുര്‍വേദ മരുന്ന്‍ കൃഷിക്ക്‌ പ്രയോജനപെടുന്ന കുളവെട്ടി മരത്തെക്കുറിച്ച് ആദ്യം മനസിലാക്കിയത് ബ്രിട്ടീഷ്‌ വനശാസ്ത്രജ്ഞനായ ഗാംബില്‍ ആണ്. 910-12 കാലത്ത്‌ കലശമല കുന്നില്‍ നിന്നാണ് മരത്തെ കുറിച്ച് പഠിച്ചത്. മരത്തിന്റെ പ്രത്യേകതകളെ കുറിച്ച് 'ഫ്ലോറ ഓഫ് ദി പ്രിഡന്‍സി ഓഫ് മദ്രാസ്‌' എന്നാ ഗ്രന്ഥത്തില്‍ അദ്ദേഹം പ്രതിപാദിച്ചിട്ടുണ്ട്. പാരിസ്ഥിതിക സമ്മര്‍ദമുള്ള സ്ഥലത്ത് വസിക്കുന്ന വൃക്ഷത്തെക്കുറിച്ച് പിന്നീട് മനസ്സിലാക്കിയത്‌ കേരള കാര്‍ഷിക സര്‍വ്വകലാശാലയിലെ പ്രൊഫ. വിദ്യാസാഗറാണ്. 2005-ലാണ് അദ്ദേഹം പഠനം നടത്തിയത്‌. തുടര്‍ന്ന ഗുരുവായൂര്‍ ശ്രീ കൃഷ്ണ കോളേജിലെ ബോട്ടണി വിഭാഗം പ്രൊഫസര്‍മാരായ പി.എല്‍.ഗണേഷും ഡോ. ഹരിനാരായണനും പഠനം നടത്തി. പശ്ചിമ മലനിരകളധിവസിക്കുന്ന കേരളത്തില്‍ മാത്രമാണ് കുളവെട്ടി ഉള്ളതെന്നാണ് ഇവരുടെ കണ്ടെത്തല്‍. കൊല്ലം ജില്ലയില്‍ നാമമാത്രമായി ഉണ്ടെങ്കിലും കലശമലയാണ് വൃക്ഷത്തിന്‍റെ അധിവാസകേന്ദ്രമെന്ന് ഡോ. ഹരിനാരായണന്‍ ചൂണ്ടിക്കാട്ടുന്നു. ഒറ്റയ്ക്കും കൂട്ടമായും ഉയരത്തില്‍ വളരുന്ന വൃക്ഷത്തിന് നൂറ്റാണ്ടുകളോളം പ്രായം ഉണ്ട്. വൃക്ഷത്തിന്റെ ഇലയും തൊലിയും വാതരോഗങ്ങള്‍ക്ക് മരുന്നായി ഉപയോഗിക്കാം.

വൃക്ഷത്തിന്റെ പ്രത്യേകതകള്‍ പരികണിച്ച് കേരള സംസ്ടിഹാന ജൈവവൈവിധ്യ ബോര്‍ഡ്‌ കുളവെട്ടിയെ ലോക പൈതൃക സ്ഥാനത്ത്‌ പ്രാഖ്യാപിച്ചു. കൃത്രിമമായി തൈകള്‍ നിര്‍മ്മിച്ചെടുക്കാനുള്ള ഗവേഷണങ്ങള്‍ വിജയപാതയിലാണ്.

ടൂറിസം സാധ്യതകള്‍

നൂറോളം സിനിമകള്‍ക്കുപോലും പശ്ചാത്തലമൊരുക്കിയ പ്രദേശമാണ് കലശമലക്കുന്ന്. കല്ലഴിക്കുന്ന് എന്നാ പേരിലറിയപ്പെടുന്ന ഈ പ്രദേശം ശരിയായ രീതിയില്‍ സംരക്ഷിച്ചാല്‍ ടൂറിസം മേഘലയില്‍ വന്‍ മുന്നേറ്റം നടത്താന്‍ പഞ്ചായത്തിനു സാധിക്കും. ടൂറിസം

പദ്ധതിയുടെ ഭാഗമായി കല്ലഴികുന്നില്‍ നിന്നും കേച്ചേരി കുന്നിലേക്കും വിലങ്ങന്‍ കുന്നിലേക്കും ഹെലികോപ്റ്ററില്‍ സഞ്ചരിച്ച് ടൂറിസം സാധ്യതകളെ പ്രയോജനപെടുത്താനും പഞ്ചായത്ത് ശ്രമം നടത്തിയെങ്കിലും നിര്‍ഭാഗ്യവശാല്‍ ആ പദ്ധതി നടപ്പിലായില്ല. എന്നാല്‍ കൂടി ഈ പ്രദേശത്തിന്റെ സാധ്യതകള്‍ മനസ്സിലാക്കി പുതിയ പദ്ധതികള്‍ക്ക് പഞ്ചായത്ത് രൂപം നല്‍കുന്നുണ്ട്.

ഈ പഞ്ചായത്തിലെ ഉയര്‍ന്ന പ്രദേശങ്ങളായ കല്ലഴിക്കുന്നും ഐതീഹ്യ പ്രസിദ്ധമായ എട്ടുവരച്ച പാറയും വിനോദസഞ്ചാരികളെ ഹഠാദാര്‍ഷിക്കുന്നവയാണ്. കൂടാതെ നരിമട, മുനിയറ, പ്രാചീന ഗുഹ, നന്നങ്ങാടികള്‍ എന്നിവയും ടൂറിസം സാധ്യതകള്‍ക്ക്‌ പ്രയോജനപെടുത്താന്‍ സാധിക്കും.

പിന്‍ക്കുറിപ്പ്‌:

പോര്‍ക്കുളം ദേശത്തിന്‍റെ ചരിത്രാന്വേഷണത്തിന്‍റെ ഭാഗമായി ഈ ദേശത്തിനു മാരാത്ത് എന്ന ഒരു നാമധേയം കൂടിയുണ്ടെന്നു മനസ്സിലാക്കുവാന്‍ കഴിഞ്ഞു.